Tokante nos

Empresa Chikí; informashon i formashon

Kámara di Komèrsio ku publikashon di nos korant na Papiamentu pa empresario “EMPRESA CHIKÍ” for di su komienso mas ku 20 aña pasa tabata i ta pa duna un bos i fuente di informashon na empresario chikí ku den kurso di tempu a kuminsá su mes negoshi i bira eksitoso i ke kompartí su eksperensianan ku otronan ku ta of ke bira empresario. Nos por siña di otro su éksitonan.

No solamente informashon, pero tambe formashon di e empresario ta un elemento di sumo importansia pa e empresario por logra e éksito ku e ta buska. Konsiderando alabes ku ta e mes ta e mes, ta importante pa e empresario por kubri mas tantu tereno ku ta posibel den e tiki tempu ku e tin banda di rùn e negoshi. P’esei tambe tin e wèpsait aki, kual ta kontené informashon balioso, pero tambe maneranan pa buska i risibí informashon relevante pa kada komersiante. Nos a tene tur kos konsiso, den planta di man di e empresario.

No solamente Kámara di Komèrsio ta hasi uso di tur medio sosial i e korant, awor tambe digital, pa tene e empresario na altura, pero tambe nos a introdusí ya pa algun aña kaba nos servisio di WhatsApp (+5999-6960885) ya ku den kareda por pidi asistensia pa risibí informashon.

Fundá na 1884 ku e meta prinsipal pa duna konseho riba materianan di komèrsio real, Kámara di Komèrsio a preokupá ku bienestar di empresario lokal. Empresariado a risibí durante tempu diferente impulso, manera seramentu di Shell, devaluashon di Bolivar, introdukshon di ‘wachtgeld’ pa ámtenar, globalisashon, trahamentu di artesania, kaida di sektor finansiero, etc., pero tambe tempunan difísil, kual danki tambe na empresanan lokal a bira tempunan di kresementu, abundansia pero tambe di kompetensia a base di digitalisashon.

Awor na 2023 e empresario ta na kas na Kámara di Komèrsio, bishitando  nos mas ku 30.000 biaha pa aña, miéntras ku na nos kursonan pa stimulá konosementu na 2022 kasi 4.000 persona a partisipá.

Pues, tantu ora bo ta un empresario establesé kaba, kuminsando un negoshi òf ora bo tin pensá of un idea pa bira un empresario, ta importante pa bo ta bon informá di aspektonan empresarial. Un bon preparashon I informashon ta importante pa bo empresa duna fruta. Kámara di Komèrsio tin konfiansa ku su wèpsait i kanalnan riba medionan sosial lo yuda bo bon den informashon, preparashon i maneho diario di bo negoshi! Manera semper, ku esaki tambe nos ta na bo servisio. No duda na yama nos si mester di kualkier otro informashon òf asistensia.

Kurso i charlanan

Kámara di Komèrsio i Industria ta organisá diferente kurso pa empresario i personanan ku ke bira empresario. Primi aki pa nos kursonan binidero.